Портокал тортички

Рецептов го меркав подолго време и никако не се решавав да го пробам иако Тања одамна го фали дека е фантастичен..веројатно ми требаше инспирација. 
Инспирацијата дојде заедно со мојата нова другарка која нагалено ја нареков Маги - the Gentle Giant, ќе имате прилика да ја видите и запознаете ;)

Рецептот е навистина прекрасен, а многу едноставен, супер вкусно и слатко, за љубители на чизкејк, не знам како би можела поадекватно да го преведам терминов, ако некој има предлог, кажувајте! :)
Фала www.rawmazing.com за рецептот! 

Опрема:
*Процесор
*Блендер

за основата:
1 чаша бадеми
1/4 чаша рогач (или какао)
4-5 урми (без семки)

за филот:
2 чаши индиски ореви (откиснати минимум 2 часа)
3 портокали - изрендана кора и исцедени
2/3 чаша јаворов сируп (или агаве, мед)
3/4 чаша кокосов путер (може и кокосово масло, доколку немате путер)
1/4 лажичка куркума (опција)
ако имате при рака есенцијално масло од портокал додадете 1/2 лажичка.

Додека ја приготвувате основата внимателно на ниска температура или во дехидратор растопете го кокосовиот путер.

Состојките за основата се мелат во процесор да се добие малку лепливо "тесто" ако не е доволно лепливо, додадете внимателно малку вода, по една до две лажици ќе биде сосема доволно.
Смесата се реди во тавче, јас користев силиконски модли за 6 мали тортички. Нека причека во фрижидер додека го подготвувате филот...

Во блендер ставете ги состојките за филот, би требало да има скоро цела чаша сок од портокал или 2/3 чаша, отприлика 3 лажици кора од портокал, се додаваат  останатите состојки, се бледира да се добие убав мазен крем и се прелева врз основата. Се става во фрижидер околу 4 часа да се зацврсти или околу 45 мин во замрзнувач.

Иако поголемиот дел отидоа за подарок, сите дома многу им се сладевме дури и деца одобрија, се решив да направам и црвена верзија со јагоди и малини и тоа беше дочекано со радост и многу мерак :)

Го правев истиот рецепт со тоа што додадов 1 чаша јагоди и 1 чаша малини, одлично излегоа.

П.С. смачканите рабови се од детски рачиња кои крадеа јаготки :)))

Путер од бадеми

Бидејќи предизвика интересирање фотката што ја постирав на мојот фејсбук профил, еве што може побрзо ви го претставувам, многу едноставно се прави, се потрудив да го сликам чекор по чекор како што го правев.

Опрема

Процесор

Иако го правев со многу моќен процесор, не брзав за да му дадам шанса да здивне и да се разлади, башка што имав придружба од две петгодишни деца кои освен што надгледуваа што се случува, правеа и по некоја беља :D
Доколку се решите да го испробате рецептот, а од се срце го препорачувам потребни се само бадеми, живи, непечени, несолени. Може слободно и со печени да се прави се разбира, во тој случај маслата уште полесно се ослободуваат, ама тоа ќе биде некоја наредна дополнителна информација.

2 чаши бадеми или околу 200-250гр се ставаат во процесор и се процесира

*ако сакате да додадете некаков засладувач направете го тоа сосема на крај кога ќе биде путерот готов инаку само ќе ја залепи смесата и нема да може да го сомеле.

полека се претвора во бадемово брашно...

 неколку минути подоцна се згуснува...

полека почнува да се прави како топка...

и таман си мислите ова ништо не бидува, маслата стануваат видливи и почнува да наликува на...

Бадемов путер! омекнува, маслата светкаат, смесата станува убава мазна :)

 и ете го!

спремно за уживањe

Сокови

После неколку, сега веќе неактивни месеци полека се разработувам и пак ќе работам на блогот. Едноставно време беше за блогерски зимски сон и посветеност на некои други животни теми, па како доаѓа пролетта и убавото сончево време ќе се разработиме и малку ќе се прочистуваме од зимската изолација. Може, нели? :)
Во наредниве денови или недели ќе ви пишувам за одредени апарати кои веќе извесно време ги користам и уште некои нови кои имам можност да ги тестирам и да ви кажам нешто повеќе за нив. За малку да ве заинтригирам, а можеби и да ве инспирирам за внесување малку повеќе жива, а особено зелена храна еве ви неколку предлози за правење сокови. Иако сум голем љубител на смуди т.е. густи зелени сокови решив малку повеќе да почнам да цедам сокови и да го раздвижам телото, да растопиме нешто од зимската изолација која се натрупала на задникот :P

На мое големо одушевување едно од моите деца ужива да прави, а богами и да пие сокови со мене, ова е еден од неговите омилени рецепти кои како што рече самиот кога првпат го проба: "да ми направиш цело буре"! :)))

Апарат: Соковник

4-5 јаболки
1-2 портокали
1 лимон
2 лажички мед (или 2-3 урми)
прстофат сол
2-3 чаши вода
мало стапче целер (по желба, не се чувствува вкусот)

Се добива околу 1 литар многу вкусна и здрава лимонада!

Зелен сок

Рецептот е од Jason Vale познат креатор на сокови има фантастични рецепти, некои ќе ви ги презентирам како што ќе ги правам!

1/2 ананас
2 мали стапчиња целер
2 зелени јаболки
1 лимон (лупен, ама задржете што е можно повеќе од белата внатрешна кора)
мало парче ѓумбир
2 гранчиња нане

во оригиналниот рецепт тој накнадно во блендер додава авокадо, јас го имав спремено но самиот сок беше толку убав и освежителен, што на крај одлучив верзијата со авокадо да ја испробам другпат. Без гајле, авокадото заврши во салата :)

Црвен сок

За овој сок немав конкретен рецепт, сите состојки се бирани инстинктивно, ама многу успешно :)

5 моркови

1 домат

2 јаболки

1 лимон

1/3 краставица

1/2 цвекло

1/2 портокал

1 стапче целер

и еве на крај ви го откривам и неговото величество - бавниот соковник Hurom, го користев за зелениот и црвениот сок и ќе го тестирам за уште рецепти деновиве. Полека ќе ви го откривам, уште многу детални информации ќе следат :)

Крекери со хељда

'Ртена хељда 1 1/2 чаша*, 

1 чаша микс од ленено семе, 
семки од сончоглед, 
семки од тиква, 
сусам, 
рехидрирани домати (сушени па отстоени во вода)
сол
зачини по желба
Сите состојки ставете ги во процесор за убаво да се измешаат и соединат, се постила на силиконски подлошки или хартија и се суши во дехидратор отрпилика 1-2 часа, потоа превртете ги фиоките, доколку лесно се одлепува од подлошките се сече на парчиња и се суши уште 5-6 часа, зависно дали сакате да бидат по меки или покрцкави.

*'Ртење хељда
1 чаша хељда, или количина по желба, се покиснува во вода отприлика 20-30 минути, потоа се плакне темелно, ќе забележите дека водата станува малку густа, како лигава и затоа е важно да се измие темелно, потоа може во цедалка или во тегла да се остави 'рти. Доколку ја 'ртите во тегла на отворот ставете парче газа и навалете ја под 45 степени да може водата да се исцеди. Се плакне наутро и навечер, се цеди водата, 'рти за ден, ден и пол. Кога ќе сакате да го стопирате процесот ставете ја во фрижидер. 
Хељдата иако најчесто или народски ја нарекуваат житарка, всушност е семе од семејството рабарбер не содржи глутен и поради тоа препорачлива за луѓе што се нетолерантни на глутен, не го покачува т.е. го регулира шеќерот во крвта, содржи 8 целосни амино-киселини, богата е со магнезиум, манган, бакар и цинк.

Дружба

Изминатава 2012 година како што повеќе се активирав околу живата храна, запознавав се повеќе луѓе заинтересирани за нешто ново свежо, информации и дружења. Некои луѓе дојдоа, некои заминаа, но сепак еден мал круг почна да се оформува, круг на убава позитивна енергија, муабети, смеење и забава. Некои успеав да ги запознаам лично, со некои не успевавме да се најдеме...барем се додека не решив да ги соберам сите на едно место. Можете да си замислите - полн погодок! :)

Сурово и вкусно, Ајде да јадеме и Raw food Mk на едно место. И најубаво од сè, ентузијазмот со кој прифатија дружба кај мене! Уште една потврда за правилото заедно сме појаки, а богами и повесели! И така се собравме на мала закуска, нешто за пиење, нешто за грицкање, во целата таа убава дружба јас не стигнав ништо да сликнам, ама за среќа Ана беше подобро подготвена и на мое огромно одушевување документирала некои рецепти.

Овој рецепт требаше да биде малку поинаков, ама одлично испадна “по грешка“ јас како за проба употребив само еден домат, за повеќе зголемете ја дозата за маринадата, за да можат убаво да се напијат.

Чипс од модри домати

1 модар домат, краевите се сечат, потоа на пола па на мали тенки “сланина“ парчиња.

Иако, препорачувам повеќе, едниот веднаш го снема! :)))

Маринада

2-3 лажици Тамари соја сос

2-3 лажици јаболков оцет

2-3 лажици (почнете со помалку) јаворов сируп

малку растопено кокосово масло (или маслиново)

сок од една лимета

1-2 прстофати кајен бибер (зависно дали сакате луто и колку)

1-2 чешниња лук, рендан 

1/2 лажичка црвен пипер

и евентуално малку сол, но имајте во предвид дека Тамари сосот е доволно солен, 

па можеби и нема потреба да се додава

ставете ги доматите да се маринираат, барем еден час, што подолго тоа подобро.

Потоа се дехидрираат, првиот саат на повисока температура, потоа на 42 степени. После еден час свртете ги и премачкајте ги пак со маринадата.

Времетраењето е по ваша желба, јас ги сушев цела ноќ (по грешка) ама добро излегоа :)
Деновиве ќе ги спремам со малку дехидрирање, па ќе ве известам и за таа варијанта.

Веганез

*потребен е блендер

1 чаша индиски ореви (откиснати)

мало цветче карфиол

1-2 лажички сенф

1 лажичка јаворов сируп (или друг засладувач)

сок од 1 лимон

1 лажичка јаболков оцет

сол

бибер

сушени зачини како босилок, оригано или по желба

малку вода

може и малку маслиново масло да се додаде

сето тоа се блендира и сервира

Сирење од бадеми

Крекери Тоскана

Смотаници!
Штета што не ги сликавме отворени да се види содржината :)
Листови од блитва, полнети со сирење од бадеми, авокадо, кромид, ситно сецкани пиперки.

Пијалокот кој плени многу женски срца во мометот кога го залепив на мојот ФБ ѕид!
Жив Бејлис, поточно полужив бидејќи сепак содржи вистински Бејлис.

*потребен е блендер

3/4 чаша откиснати индиски ореви

1 лажичка мескит

1 лажичка мака

1 лажичка јаворов сируп

малку кардамом

се блендира со отприлика 600-700 мл вода

и се додава Бејлис по желба колку сакате да се чувствува вкусот

Ова е нешто што може секој ден да се пие, супер здраво, енергетизирачки алкален пијалок!

Жива Сангрија

*потребен е соковник

2 чаши сок од цвекло (отприлика 3-4 парчиња)

1 чаша сок од портокал

1 чаша сок од јаболко или круша

1 стапче цимет

1 прстофат кајен бибер (опција)

2 чаши насечено овошје (јаболко, портокал, лимета)

се мешаат соковите, се додава исеченото овошје, промешајте и се оставете го барем половина час да отстои во фрижидер. 

На здравје!

Со мало задоцнување ама еве го и линкот од рецептите кои исто така се најдоа на нашата дружба Ана е малку повредна од мене што се однесува до пишување блог :)))
Љубов на прва гозба :)

Ајде да јадеме

Сурово и вкусно