Кечап

Иако рецептот не е жив топло го препорачувам како додаток со жива или готвена храна, многу е вкусно!
1-1 1/2 кило домати се сечат на парчиња (не треба да се лупат), се отстрануваат семките, се редат во тавче и потоа се попрскуваат со свежа мајчина душица и сушен босилен, малку сол и црн пипер, се попрскува со маслиново масло и се потпекува на 100 степени во рерна 4-5 часа. Потоа сето се блендира и добивате преубав супер вкусен кечап! Се чува во фрижидер и се јаде со сè што ќе ви падне на памет! 
Имајте во предвид дека излегува третина од првичната количина домати што ќе ја употребите. Кај нас не трае долго!

Ферментирана павлака

Пред некој ден конечно го гледав култниот филм Forks over Knives, го препорачувам од сè срце, особено ако се грижите за својата исхрана, и ако сè уште јадете млечни и животински продукти, обавезно треба да го погледнете. Меѓу сите информации се зборува и за штетноста на касеинот, која се содржи во млечните продукти.

За сите оние кои се откажуваат или можеби решиле да ги редуцираат процесираните млечни продукти, да ве утешам има замена, и тоа многу вкусна! 

Оваа верзија е ферментирана 24 часа со пробиотик

2 чаши индиски ореви (откиснати 2-3 часа)

сок од 1/2 лимон

1/2 лажичка сол

1 мала лажичка пробиотик

се додава само малку вода за полесно да се изблендира. Откога ќе се изблендира се става во газа, газата во цедалка, а најдобро цедалката да биде во сад кој не допира на дното од садот. Внимателно се завиткува сирењето и се става нешто тешко одозгора за нежно да притиска и полека да се отцеди вишокот вода. Се остава на собна температура, на темно да ферментира 24-48 часа.

Накнадно може да се додадат зачини по желба! 

Оваа година премиерно ќе го поддржиме Вегефест во Скопје, дојдете да се дружиме, ќе биде весело и вкусно! Raw food Mk здружува сили со Сурово&вкусно и Ајде да јадеме за да ви подготвиме нешто интересно, Ве очекуваме!

Летни хитови

За разладување во жешки летни денови, а и ноќи! ;)

Апарат

Блендер

Ледена диња

1 Диња

неколку стапчиња нане

мраз (по желба)

Извадете ги семките од дињата со лажичка, исечете ја на парчиња и заедно со ливчињата нане (без стебленцата) изблендирајте ја во блендер. Voilà! Освежителен полу-густ сок што разладува, освежува, а и ќе ве држи сити извесно време!

Сок од лубеница

2 резанки лубеница (по можност исчистени од семки)

сок од 1 лимон или лимета

неколку гранчиња нане или босилек (само ливчињата се користат)

Лубеницата се сече на помали парчиња, ако нема премногу семки, т.е. ако не сте доволно мрзливи исчистете ги семките и изблендирајте сè заедно. Ако сепак не сте ги отстраниле сите семки препорачувам сокот да го прецедите или низ ситна цедалка или уште подобро низ вреќичка за цедење, и парче газа може да послужи.

Овежително сезонско смуди:)

Смуди Праска

4 праски 

сок од 2 портокали

1 1/2 замрзната банана

една рака замрзнат спанаќ или неколку листови свежа блитва

4-5 гранчиња нане

може да се додаде малку вода или коцки мраз!
А, да и децата се сладеа ;)

Ледени бонбони малина

Ледениве бонбони - залчиња беа мал експеримент додека ја правев Сладолед Малина торта само одвоив малку од кремот и наполнив неколку модли, ги ставив во замрзнувач и ги уживавме како десерт :)

За поголема количина би било потребно околу

3/4 чаша (откиснати) индиски ореви

3/4 чаша малини (или овошје по желба)

1/4 чаша кокосово масло

1/4 чаша агаве (мед, јаворов сируп или друг засладувач)

1-2 лажици лимонов сок 

Сосотојките во блендер, да се добие мазна смеса и потоа во калапчиња, се замрзнува околу 45 мин и се ужива! ;)

Сладолед Малина торта

Без причина, но со повод! :) 

Страницата на RawFoodMk каде неколку вредни девојки споделуваат рецепти и позитивни вибрации креирани од своите скромни кујни собра цели 3000 лајкови, мене ми е посимпатично да ги наречам симпатии, и за мене беше убава инспирација за частење. Рецептот е базиран на многу други рецепти кои можат да се најдат на интернет и одамна посакував да ја направам. 

Ви ја претставувам сладоледната Торта Малина!

Апарати

Процесор

Блендер

Основа:

1 1/2 чаша лешници

3/4 чаша урми

прстофат хималајска сол

Крем

2 чаши индиски ореви (откиснати 4-5 часа)

2 чаши малини (доколку користите замрзнати, оставете да се одмрзнат)

сок од 2 лимони

1/3 кокосово масло

1/3 чаша агаве

1 лажичка ванила екстракт или семки од едно ванила стапче

Во процесор се мелат лешниците и полека се додаваат урмите додека не стане малку лепливо тесто, ако треба капнете малку вода, ама многу внимателно, треба да биде зрнесто, но кога ќе го фатите со рака да лепи. Се реди во тавче, јас користев од 20цм дијаметар.

Состојките за филот ставете ги во блендер, БЕЗ малините! се мати да стане кремаста смеса. Доколку немате високобрзински блендер како Vitamix откиснете ги оревите подолго време и можеби ќе треба да додадете малку вода. Отприлика 1/2 или помалку од кремот се мачка врз основата. Ако сакате да бидат боите одвоени ставете го тавчето во замрзнувач 15-тина минути. 

Во останатиот дел од кремот, се додаваат малините и повторно се блендира. Намачкајте го и розевиот малина слој, и ставете ја тортата во замрзнувач! 
Извадете ја отприлика 30-тина минути пред сервирање. Може веднаш да се јаде како сладоледна торта, а ако имате малку трпение ќе уживате во божествена кремаста торта! 

Фалафел/Бургери

Лесна и брза верзија на жив фалафел, во споредба со киснење и 'ртење наут, кое одзема и до 3 дена. Одлични се со богата шарена салата!

Апарат
Процесор 

Рецепт

2 чаши рендани моркови (отприлика 5-6)

1 чаша сончогледови семки (откиснати 4-5 часа)
1/4 чаша мелено ленено семе
1 чаша ситно сецкан магдонос
1 лукче
3 лажици сецкан кромид (од еден голем отприлика 1/4)
хималајска сол
1/2 лажичка кари или зачини по желба (италијански мешавини добро се вклопуваат)
1/2 чаша сусам

ким

Во процесор се мелат прво морковите да стане како паста, потоа се додава лук, сончогледот и лененото семе, повторно се процесира и на крај се додава кромид и магдонос. Тоа добро се блендира и на крај во посебна чинија се меша сé, се додава сусамот, најлесно е со рака, се формираат топчиња или како бургери и се сушат во дехидратор неколку часа, во зависност колку крцкава кора сакате да. Може и веднаш да се јадат!

На здравје:)

Тортички од морков

Мали вкусни залчиња, многу лесни за правење, верувам дека и најголемите скептици за жива храна би ги смачкале без да им падне на памет дека се направени од моркови.

Апарати

Процесор

Блендер

Рецепт

1 1/2 чаша рендан морков (3-4 моркови средна големина)

1/2 чаша бадемово брашно

1/3 чаша кокосово брашно

1/3 чаша исецкани ореви

1/4 чаша суво грозје

1 лажичка лимонов сок

1 лажичка цимет во прав

1/2 лажичка морско оревче

1 лажичка ванила

Крем од индиски ореви

1 чаша откиснати индиски ореви

1/3 чаша лимонов сок

2 1/2 лажички кокосово масло

2 лажички мед (или јаворов сируп, стевија...засладувач по желба и вкус)

Морковите се рендаат во процесор, (јас користам Magimix), потоа се додаваат сите останати суви состојки и се процесира да се добие смеса помалку леплива налик на тесто. Се реди во калапчиња и се остава во фрижидер.

Шлаг од индиски ореви со лимон

Состојките за шлагот се блендираат додека да се добие мазна кремаста структура. По желба се украсуваат тортичките. 

* за веганска варијанта заменете го медот со друг засладувач

9 билки и зачини како додаток во смуди

1. Магдонос - само се мие нежно, може да се користи целосно, и стебленцата и листовите, одличен прочистувач.

2. Коријандер - исто така се користат и стебленца и листови, нежно се мие.

3. Копар - претходно измиен, може да се користи целосно.

4. Нане или мента - нането има поцврсти дрвенести стебленца, најдобро е да се измие и внимателно да се одвојат ливчињата. Стебленцата не се користат.

5. Босилек - исто како нането има цврсти стебленца, се користат само листовите.

6. Ѓумбир - личен фаворит! Може да се користи и лупен или не, во зависност колку е јак блендерот, се лупи многу лесно со нож, лушпата е многу тенка, може и рендан 

да се додаде.

7. Куркума (Турмерик) - исто како Ѓумбирот, може, а и не мора да се лупи.

8. Лук, кромид, млад кромид - многу моќни кога се користат блендирани, да се има во предвид дека додаваат исклучително јак вкус во некои рецепти и доминираат, препорачливи се за солените верзии, но можат да упропастат слатки комбинации.

9. Мелени зачини - како на пример цимет, морско оревче, кардамом, ванила, анасон  - можат да бидат интересен додаток, и на вкус и мирис. За почеток се става многу мала количина, околу 1/4 лажичка ако не ви се познати вкусовите, потоа може и повеќе.

Карамелки

На рецептот налетав на интернет и само што го здогледав знаев дека вреди да се проба! Направив некои ситни измени во рецептот, само со состојките на основата, во оригиналот имаше бадеми и какао, јас решив да пробам со индиски ореви и рогач, за вакви ситни промени или додатоци на рецептите се водам исклучиво инстинктивно, ретко кога грешам, башка оваа кујна нуди толку слобода и креативност, мислам дека е навистина тешко нешто да се утне. Повелете Карамел Бајадери! ги сликнав само навечер и фотографијата не е баш најдобра, едноставно...се изедоа пребрзо! Ќе ги правам набрзо повторно и ќе се обидам(!) да се воздржам и да ги сликам подобро :)))

Апарат: 

процесор

Основа

1/2 чаша урми

1 1/2 чаша индиски ореви

1 лажичка ванила екстракт

Карамел

1/2 чаша таан

1/2 чаша јаворов сируп

1/4 чаша кокосово масло (растопено)

1 лажичка ванила екстракт

прстофат хималајска сол

Чоколаден прелив

4 лажици рогач (или какао)

3-4 лажици јаворов сируп (или мед, агаве)

1/2 чаша кокосово масло (растопено)

Во процесор се мелат индиските ореви и се додаваат урмите да стане леплива маса, ако не се лепи доволно може да се додаде внимателно 1 лажица вода. Смесата се реди во тавче.

Состојките за карамелот се мешаат во стаклен сад, најлесно со жица за матење, ќе се претвори во преубава мазна карамел структура и тоа се мачка врз основата.

Ставете го во замрзнувач 10-тина минути да се стегне карамелот.

Потоа во стаклен сад се мешаат состојките за чоколадниот прелив и се премачкува колачот. Имајте во предвид дека доколку колачот стоел во замрзнувач карамелот е многу студен и ќе ја излади чоколадата веднаш па треба брзо да дејствувате :)

На здравје сладење! Ве предупредувам - фантастични се! :)

Шарени сокови

Уште нешто колоритно од колекцијата сокови, а деновове и нешто многу поконкретно и подетално за самиот соковник Hurom! 

Едноставен рецепт со локални сезонски состојки:

3 јаболки

2 моркови

1/2 лимон

1/2 цвекло

1/2 авокадо*

Сите состојки освен авокадото се цедат во соковник, авокадото го додадов накнадно во сокот и го свртев во блендер, стана преубава мазна структура, како свилен, розев пудинг. Ако е многу густо може да се додаде и малку вода. 

П.С. Пројде и кај деца без никаков проблем!

Не се плашете од авокадото, нема некој посебен вкус и мирис, само супер здрави маснотии и многу лесно се комбинира со други вкусови. 

Авокадото според многу истражувања се смета за најсовршената храна на светот, содржи преку 20 хранливи состојки, како хранливи влакна, здрави моносатурирани и полисатурирани маснотии како омега-3 масни киселини, богат со витамин А, Ц, Д, Е, К и Б (тиамин, рибофлавин, ниацин, пантотенска киселина, биотин, Б-6, Б-12, фолна киселина и калиум. Постојат многу докази дека е многу ефикасен против Алцхајмерова болест, канцер, срцеви заболувања, дијабетес...

* * *

Од колекцијата зелени сокови, наречени среќа во чаша :)

2 јаболки

2 портокали

1 лимета

неколку стапчиња целер

2-3 раце спанаќ

2-3 гранчиња нане

малку ѓумбир

чудесна комбинација на"топло-ладно", нането разладува и освежува, совршен додаток во сокови за топли денови, додека ѓумбирот го загрева телото, неодолива комбинација!

Целерот е прочистувач и благ диуретик, јаболките се богати со пектин, особено корисен за кој сака да слабее, а портокалите и лиметата се преполни со Ц витамин кој го потпомага целиот процес и го зајакнува имунитетот. 

* * *

Освежителна лимонада за топли спарни денови

3-4 зелени кисели јаболки

1 лимета

1/2 лимон

неколку гранчиња нане

Пикантни Браунис

Рецептот всушност не е нов, ама по подолго време решив повторно да го правам, особено што во меѓувреме најдов кајен пипер кој многу го бендисувам, а е исто така и многу здрав. Оригиналниот рецепт содржи чипотле пипер кој се прави од чили пиперчиња, ама сеуште не сме се сретнале па одлучив да испробам со кајен. Ова се истите оние Браунис кои веќе ги има на блогот само со некои мали измени. Ако случајно немате при рака кајен или ѓумбиров сок или пак свеж ѓумбир - без паника благцево е солидно благо и бомбастично и без тоа :)

Aпарат: 
Процесор

Основа:
2 чаши ореви
1 чаша рогач (наместо какао)
1 лажичка кајен пипер
1 лажичка цимет
прстофат хималајска сол
1/2 чаши урми
1/2 чаша суви смокви
ванила
прстофат сол
Во процесор (со Ѕ сечиво) се мелат оревите, се додава рогачот, циметот, повторно се меле за да се измеша смесата, се додаваат урмите и смоквите полека и се меле да стане како тесто, потоа се реди во тава/модла.

Овој пат малку експериментирав и додадов 1 1/2 лажица сок од ѓумбир и лимон* (*рецепт подолу), му даде една убава топлина и свежина на вкусот.
Ѓумбирот спаѓа во храна што го загрева телото и заедно со кајен пиперот многу добро се надополнуваат.
Тестото се реди во тавче и може да се стави во фрижидер додека се подготвува кремот.
Чоколаден крем
1/2 чаша какао
1/2 чаша агаве
1/4 чаша кокосово масло
1/2 лажичка цимет
1 лажичка кајен пипер

Во стаклен сад со жица се мешаат сите состојки, станува како густ какао прелив, малку наликува на нутела, а вкусот е неверојатен!
Се истура кремот одозгора и се става во фрижидер неколку часа, или во замрзнувач 1 час.

Сок од ѓумбир (по желба)
1 корен ѓумбир се цеди низ соковник зедно со 1 лимон... тоа е се! :) може да се додаде и јаболко за да го заблажи бидејќи е луто, ние дома си ја нарековме жива ракија! ;)







Имајте убави весели и безбрижни празници! :)

Портокал тортички

Рецептов го меркав подолго време и никако не се решавав да го пробам иако Тања одамна го фали дека е фантастичен..веројатно ми требаше инспирација. 
Инспирацијата дојде заедно со мојата нова другарка која нагалено ја нареков Маги - the Gentle Giant, ќе имате прилика да ја видите и запознаете ;)

Рецептот е навистина прекрасен, а многу едноставен, супер вкусно и слатко, за љубители на чизкејк, не знам како би можела поадекватно да го преведам терминов, ако некој има предлог, кажувајте! :)
Фала www.rawmazing.com за рецептот! 

Опрема:
*Процесор
*Блендер

за основата:
1 чаша бадеми
1/4 чаша рогач (или какао)
4-5 урми (без семки)

за филот:
2 чаши индиски ореви (откиснати минимум 2 часа)
3 портокали - изрендана кора и исцедени
2/3 чаша јаворов сируп (или агаве, мед)
3/4 чаша кокосов путер (може и кокосово масло, доколку немате путер)
1/4 лажичка куркума (опција)
ако имате при рака есенцијално масло од портокал додадете 1/2 лажичка.

Додека ја приготвувате основата внимателно на ниска температура или во дехидратор растопете го кокосовиот путер.

Состојките за основата се мелат во процесор да се добие малку лепливо "тесто" ако не е доволно лепливо, додадете внимателно малку вода, по една до две лажици ќе биде сосема доволно.
Смесата се реди во тавче, јас користев силиконски модли за 6 мали тортички. Нека причека во фрижидер додека го подготвувате филот...

Во блендер ставете ги состојките за филот, би требало да има скоро цела чаша сок од портокал или 2/3 чаша, отприлика 3 лажици кора од портокал, се додаваат  останатите состојки, се бледира да се добие убав мазен крем и се прелева врз основата. Се става во фрижидер околу 4 часа да се зацврсти или околу 45 мин во замрзнувач.

Иако поголемиот дел отидоа за подарок, сите дома многу им се сладевме дури и деца одобрија, се решив да направам и црвена верзија со јагоди и малини и тоа беше дочекано со радост и многу мерак :)

Го правев истиот рецепт со тоа што додадов 1 чаша јагоди и 1 чаша малини, одлично излегоа.

П.С. смачканите рабови се од детски рачиња кои крадеа јаготки :)))

Путер од бадеми

Бидејќи предизвика интересирање фотката што ја постирав на мојот фејсбук профил, еве што може побрзо ви го претставувам, многу едноставно се прави, се потрудив да го сликам чекор по чекор како што го правев.

Опрема

Процесор

Иако го правев со многу моќен процесор, не брзав за да му дадам шанса да здивне и да се разлади, башка што имав придружба од две петгодишни деца кои освен што надгледуваа што се случува, правеа и по некоја беља :D
Доколку се решите да го испробате рецептот, а од се срце го препорачувам потребни се само бадеми, живи, непечени, несолени. Може слободно и со печени да се прави се разбира, во тој случај маслата уште полесно се ослободуваат, ама тоа ќе биде некоја наредна дополнителна информација.

2 чаши бадеми или околу 200-250гр се ставаат во процесор и се процесира

*ако сакате да додадете некаков засладувач направете го тоа сосема на крај кога ќе биде путерот готов инаку само ќе ја залепи смесата и нема да може да го сомеле.

полека се претвора во бадемово брашно...

 неколку минути подоцна се згуснува...

полека почнува да се прави како топка...

и таман си мислите ова ништо не бидува, маслата стануваат видливи и почнува да наликува на...

Бадемов путер! омекнува, маслата светкаат, смесата станува убава мазна :)

 и ете го!

спремно за уживањe